Ukuqeda Inkonzo Yenkolo

Kusukela ekuqaleni komsebenzi wakhe endaweni yonke, uNkulunkulu wakhetha phambilini abantu abaningi ukuba bamkhonze, kuhlanganisa abantu abavela kuzo zonke izinhlangothi zomhlaba. Injongo yakhe ukufeza intando Yakhe nokuqiniseka ngokuthi umsebenzi Wakhe emhlabeni uthela izithelo.

Lena injongo kaNkulunkulu yokukhetha abantu ukuba bamkhonze. Wonke umuntu okhonza uNkulunkulu kumele ayiqonde le ntando kaNkulunkulu. Kuwo wonke lo msebenzi Wakhe, abantu bakubona kangcono ukuhlakanipha kukaNkulunkulu nokuba kukaNkulunkulu nawo wonke amandla, futhi kusiza abantu baqonde imiyalo yomsebenzi Wakhe emhlabeni. UNkulunkulu weza ngokuqondile emhlabeni ukuzokwenza umsebenzi Wakhe nokuthinta abantu ukuze bazi izenzo Zakhe ngokucacile. Namuhla, kuyilungelo ngeqembu labantu ukukhonza uNkulunkulu ongokoqobo. Lokhu kuyisibusiso senu esikhulu. UNkulunkulu ngempela uyaniphakamisa. Lapho uNkulunkulu ekhetha umuntu ukuba amkhonze, ahlale enemiyalo Yakhe. Ukukhonza uNkulunkulu akuyona nje indaba yogqozi njengoba abantu becabanga. Namuhla umuntu angazikhonzela uNkulunkulu, njengoba ungase ubone, ngoba abantu baqondiswa uNkulunkulu futhi banomsebenzi kaMoya Ongcwele; futhi ngenxa yokuthi bazingela iqiniso. Lezi izimfuneko eziyisisekelo sokuba isikhonzi sikaNkulunkulu.

Ukukhonza uNkulunkulu akulula. Labo abasimo sabo esikhohlakele asishintshi abanakumkhonza uNkulunkulu. Uma isimo sakho singahlulelwanga futhi sajeziswa izwi likaNkulunkulu, kusho ukuthi isimo sakho sisamelela uSathane. Lokhu kwanele ukuveza ukuthi inkonzo yakho kuNkulunkulu kufanele ibe nezinhloso ezinhle. Inkonzo esekelwe ebusathaneni. Ukhonza uNkulunkulu ngesimo sakho esingokwemvelo, nangenxa yezinto ozithandayo; ngaphezu kwalokho, ulokhu ucabanga ukuthi uNkulunkulu uthanda noma yini oyithandayo, nokuthi uNkulunkulu uzonda noma yini ongayithandi, futhi umsebenzi wakho uqondiswa ngokuphelele yizinto ozithandayo. Ingabe lokhu kungabizwa ngokukhonza uNkulunkulu? Ekugcineni isimo sempilo yakho ngeke sishintshwe yinto encane. Eqinisweni, uyoba nenkani ngisho nakakhulu ngoba ubukhonza uNkulunkulu, futhi iyokwenza isimo sakho esonakele sibe nzima nakakhulu. Ngaphakathi, uzozakhela izimfundiso zokukhonza uNkulunkulu ezingasekelwe ndawo ngaphandle kobuntu bakho, nasesipiliyonini osithole ngenxa yokukhonza ngokuvumelana nesimo sakho. Lokhu ukulandisa okuphathelene nabantu kanye nezifundo. Kuwumbono womuntu ngokuphila. Abantu abanjengalaba baphakathi kwabaFarisi nabaholi benkolo. Uma bengavuki emaqandeni baphenduke, bazophenduka amaKristu amanga ayeyovumbuka ezinsukwini zokugcina. Bayoba abakhohlisi. AmaKristu amanga nabakhohlisi okwakuthiwe bayovela kulolu hlobo lwabantu. Uma labo abakhonza uNkulunkulu belandela ubuntu babo futhi benze ukuthanda kwabo, kusho ukuthi basengozini enkulu yokulaxazwa. Labo abasebenzisa iminyaka yabo eminingi bekhonza uNkulunkulu ukuze bayenge izinhliziyo zabantu, bashumayeze futhi balawule abantu, beziphakamise—lowo ongakaze aphenduke, agonyuluke, aqhakambise izinzuzo zesikhundla—laba bantu bayowa phambi kukaNkulunkulu. Bangabantu abawuhlobo olulodwa noPawulu, babukisa ngeminyaka yabo. UNkulunkulu ngeke abaphelelise kanje abantu. Lolu hlobo lwenkonzo lugxambukela emsebenzini kaNkulunkulu. Abantu bayathanda ukubambelela kokudala. Banamathela ezinkolelweni ezindala, banamathela ezintweni ezedlule. Lesi isiphazamiso esikhulu enkonzweni yabo. Uma ungakwazi ukuzilahla, lezo zinto ziyokunamathela ukuphila kwakho konke. UNkulunkulu ngeke ajabule ngawe, ngisho nakancane, ngeke ngisho ungaze uphuke umlenze noma umgogodla usebenza, ngeke ngisho ungaze udabukise kanjani “enkonzweni” kaNkulunkulu. Kuyokwenzeka okuphambene: Uyothi uwumenzi wobubi.

Kusukela namhlanje, uNkulunkulu uzophelelisa labo abangenazo izinkolelo zenkolo, abakulungele ukushiya ubuntu obudala, balalele kuphela uNkulunkulu, aphelelise labo abalangazelela izwi likaNkulunkulu. Laba kumele babhukule bakhonze uNkulunkulu. KuNkulunkulu kunenala engapheli yokuhlakanipha. Okwamanje, lezi zinto ngeke zamukelwe yilabo abanezinkolelo zenkolo, labo abaqhakambisa iminyaka, nalabo abangeke babulahle ubuntu obudala. UMoya Ongcwele ngeke ube nethuba lokuphelelisa labo bantu. Uma umuntu engathandi ukulalela, futhi engalomeli izwi likaNkulunkulu, ngeke akwazi ukwamukela izinto ezintsha. Uyolokhu ehlubuka nakakhulu, eba nobuqili nakakhulu, agcine esemgudwini ongafanele. Emsebenzini kaNkulunkulu manje, uyovusa abantu abaningi abamthanda ngeqiniso, abangemukela ukukhanya okusha. Uyonciphisa izikhulu zenkolo eziqhakambisa iminyaka yazo. Akafuni kube ngisho nomuntu oyedwa omelana noshintsho. Ingabe uyafuna ukuba ngomunye walabo bantu? Ingabe inkonzo yakho uyenza ngendlela othanda ngayo, noma ingabe wenza lokho okufunwa uNkulunkulu? Lena into okufanele uyazi ngawe. Ingabe ungomunye wezikhulu zenkolo, noma ingabe uwusana olusanda kuzalwa olupheleliswa uNkulunkulu? Ingakanani ingxenye yenkonzo yakho eyamukelwa uMoya Ongcwele? Ingakanani uNkulunkulu angeke ngisho ayikhumbule? Ngemva kweminyaka eminingi yenkonzo, mingakanani umehluko osuwenzile ekuphileni kwakho? Ingabe awunankinga ngakho konke lokhu? Uma unokholo lweqiniso, kusho ukuthi uzohlukana nezinkolelo zenkolo, umkhonze kangcono uNkulunkulu ngendlela entsha. Uma uwakhuphula manje amasokisi, akukephuzi kakhulu. Izinkolelo ezindala zenkolo ziyokukhinyabeza ukuphila komuntu. Isipiliyoni somuntu siyomphambukisa kuNkulunkulu, enze izinto ngendlela yakhe. Uma ungazishiyi lezi zinto, zizokuqumba phansi ukuphila kwakho. UNkulunkulu ubelokhu ebaphelelisa labo abamkhonzayo. Akabalaxazi kanjalo nje. Unekusasa eliqhakazile uma wamukela ukwahlulelwa nokujeziswa yizwi likaNkulunkulu, uma ungabeka eceleni imikhuba yakho emidala yenkolo nezimfundiso, futhi ugweme ukusebenzisa izinkolelo zenkolo ezindala njengesikali sezwi likaNkulunkulu. Kodwa uma ubambelela ezintweni ezindala, uma usazazisa, ngeke usindiswe. UNkulunkulu akanandaba nabantu abanjalo. Uma ufuna ngempela ukupheleliswa, kumele ukulungele ukukushiya ngokuphelele konke okudala. Ngisho noma owawukwenza ngaphambili kwakukuhle, ngisho noma kwakuwumsebenzi kaNkulunkulu, kufanele ukubeke eceleni; akumele ubambelele kukho. Ngisho noma kwakusobala ukuthi umsebenzi kaMoya Ongcwele, owenziwa ngokuqondile uMoya Ongcwele, namahlanje kumele ukubeke eceleni. Akumele ubambelele kukho. Yilokhu uNkulunkulu akufunayo. Konke kumele kwenziwe kube kusha. Emsebenzini kaNkulunkulu nasezwini likaNkulunkulu, akabhekiseli ezintweni ezindala ezenzeka, akembi umlando omdala. UNkulunkulu uhlale emusha akagugi. Akabambeleli emazwini Akhe edlule. Lokhu kubonisa ukuthi uNkulunkulu ayikho imfundiso ayilandelayo. Uma uhlale ubambelela ngokuqinile ezintweni ezedlule futhi uzisebenzisa ngokuphikelela njengendlela yokwenza izinto kuyilapho uNkulunkulu engasasebenzi ngalezo ndlela, ingabe amazwi nezenzo zakho njengomuntu akusona yini isiphazamiso? Awuphendukanga yini isitha sikaNkulunkulu? Ingabe uzimisele ukonakalisa ukuphila kwakho konke ngenxa yalezi zinto ezindala? Lezi zinto ezindala zikwenza umuntu ophazamisa umsebenzi kaNkulunkulu. Ingabe lolo uhlobo lomuntu ofuna ukuba yilo? Uma ungakufuni ngempela lokho, yekela le nto oyenzayo ngokushesha uphenduke; uqale kabusha. UNkulunkulu akazikhumbuli izinto ezindala.

Umthombo kusuka： UMFULA OHLANZEKILE WAMANZI OKUPHILA